عريس الشرقية
-مين ده؟
=عريس الشرقية.
-حصله إيه؟
=سافر السعودية كون نفسه، نزل مصر حدد معاد فرحه وفجأة مات بعد فرحه وقبل ما يوصل شقته!
في يوم سيدنا النبي صلى الله عليه وسلم والصحابة رضوان الله عليهم سافروا من المدينة لمكة، وهما في الطريق عدوا على مكان فيه مياة يُقال إن المكان إسمه "شعب الخرار".
فالصحابي سهل بن حنيف قرر يغتسل وينضف جسمه من تراب السفر.
ومن المعروف إن مكة و المدينة أو الأماكن الصحراوية عمومًا الرجال فيها بتكون بشرتهم جافة ومسمرة شوية نتيجة تعرض الجلد بشكل مباشر للرياح المُحملة بالتراب وأشعة الشمس الشديدة جدًا.
الغريب بقى إن سيدنا سهل رضي الله عنه كانت بشرته على النقيض تمامًا، كانت شديدة البياض والجَمال!
وده اللي لفت نظر الصحابي عامر بن ربيعة؛ لما شاف جلد سيدنا سهل وهو بيغتسل
فقال:"ما رأيت كاليوم ولا جلد مخبأة "
(يعني عمري ماشوفت قبل النهاردة جلد راجل يشبه جلد البنت اللي عمرها ما تعرضت لشمس بل أحسن منها)!
ومجرد ما سيدنا عامر بص لسيدنا سهل وقال الجُملة دي، وقع سيدنا سهل من طوله وماحطش منطق!
كل الصحابة حاولوا بكل الطرق يفوقوا سيدنا سهل وللأسف فشلوا!، فشالوه وجريوا بيه على سيدنا النبي وقالوله:" يا رسول الله، هل لك في سهل والله ما يرفع رأسه "
فسيدنا النبي صلى الله عليه وسلم رد وقال:"هل تتهمون فيه من أحد؟"
فقالوا:"نظر إليه عامر بن ربيعة!"
فسيدنا النبي صلى الله عليه وسلم بعت حد من الصحابة يجيب سيدنا عامر.
ولما جه سيدنا عامر، سيدنا النبي بغضب شديد سأله سؤال فقال:"علام يقتل أحدكم أخاه؟، هلا إذا رأيت ما يعجبك برَّكت!"
(ليه بنظرة عين أو حسد يقتل حد منكم أخوه؟)
-يعني إيه"هلا إذا رأيت ما يعجبك بركت"؟!
=يعني لما تلاقي حاجة حلوة عند حد ولفتت نظرك مفروض إنك تدعي ربنا يزيده ويباركله فيها فتقول"اللهم بارك، أو تبارك الله، بارك الله لك"
وبعد لما عاتب سيدنا النبي صلى الله عليه وسلم سيدنا عامر بن ربيعه، أمره صلى الله عليه وسلم إنه يغتسل لسهل.
-يعني إيه يغتسل لسهل؟!
=يعنى أمره يجيب مية نضيفة عادية و يغسل وشه وإيده لحد الكوع وركبتيه وأطراف رجليه ويحط جزء من إزارة في الإناء (الإزار هو الثوب الذي يغطي اسفل البدن)
.....وقيل أن الوضوء العادي يجوز والله اعلم✋
وتتجمع مية الغُسل دي كلها في إناء وتتصب من ورا على راس وضهر سيدنا سهل.
-وعملوا كده فعلًا؟
=ايوة، وبمجرد ما صبوا عليه المية فاق وقام ومشي وسط الصحابة وكإن شيئًا لم يكن!
-هو ده اللي إسمه الحسد؟!
=لا دي إسمها العين.
-وإيه الفرق؟!
=الفرق كبير جدًا، العائن هو اللي شاف حاجة حلوة عند حد وعجبته ونسي يدعيله بالبركة والزيادة فغصب عنه أذاه، والعائن على فكرة ممكن يكون أب أو أم أو أخ، أي حد ممكن يكون بيحبك مش لازم يكون بيكرهك و ممكن يكون حد صالح ورجل دين أو بنت متدينة عادي، ما سيدنا عامر رضي الله عنه كان صحابي وعان سيدنا سهل بدون قصد.
أما الحاسد فده شخص كاره حاقد بيتمنى زوال الشيئ الحلو من عندك وبيتمنى حرمانك منه وعذابه عند ربنا شديد جدًا جدًا.
وعشان كده لازم لما تشوف حاجة حلوة عند غيرك تقول اللهم بارك، ما شاء الله تبارك الله، اللهم زد وبارك❤
-ولو حاجة الحلوة دي عندي أنا أقول اللهم بارك؟
=قول ما شاء الله لا قوة إلا بالله.
قال تعالى:"وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ ۚ إِن تَرَنِ أَنَا أَقَلَّ مِنكَ مَالًا وَوَلَدًا (الكهف:39)
أما لو عند غيرك هتقول "اللهم بارك" زي ما سيدنا النبي علمنا❤
ولو حد تعب ماتتكسفش تعرض مية تكون مُغتسل بيها ، لعلك أصابته بالعين بدون قصد، وحط دايمًا نية إنها سنة عن حبيبك النبي صلى الله عليه وسلم❤
وإياك تزعل لو حد طلب منك تغتسله مخصوص، إيه المشكلة!
العين ممكن تدخل صاحبها القبر فخلص ضميرك من الذنب حتى لو انت متأكد إنك مش السبب.
روى أبو داود عن عائشة رضي الله عنها قالت : كان يؤمر العائن فيتوضأ ثم يغسل منه المعين . وصححه الألباني في صحيح أبي داود .
-في أدلة عن أذى العين؟!
=أيوة.. قال النبي صلى الله عليه وسلم :"العين حق ، ولو كان شيء سابق القدر سبقت العين، وإذا استغسلتم فاغسلوا " رواه مسلم
وما رواه أبو نعيم في الحلية وابن عدي بإسناد حسن عن جابر رضي الله عنه أن النبي صلى الله عليه وسلم قال: "العين تدخل الرجل القبر، وتدخل الجمل القدر"
عن جابر رضي الله عنه عن النبي صلى الله عليه وسلم قال:" أكثر من يموت من أمتي بعد قضاء الله وقدره بالأنفس. يعني: بالعين💔